22. Gebedsgedagte: Sy Majesteit!
(Ps 9:2-3) "Here, ek sal U prys met my hele hart. Ek sal vertel van al U wonderlike dade. Ek sal juig in die vreugde wat U gee. Ek sal U Naam prys, o Allerhoogste."- Elke dag word ons gebombadeer met negatiewe nuus in die media en ons word nie eens meer geraak deur alles wat verkeerd is nie. Mense se swakhede en dade word uitbasuin en ons sê, dis maar net nóg een wat verkeerde keuses gemaak het. Mense leef al meer negatief en pessimisties. Min tyd word gegee aan die goeie dinge in die lewe. Die goedvoel stories! En daar is sóveel wat goed is in die wêreld, as ons net die moeite wil doen om dit raak te sien. God se skepping is en bly steeds die grootste wonder. Kyk na die vooruitgang wat mense deur die jare gemaak het om ons lewens te vergemaklik. Die wonder verhale van genesing, herstel en uitkoms na krisisse. Mense wat ander met liefde help. Voel jy die lewe druk jou neer, of loop alles skeef en sak wanhoop oor jou? Is jy magteloos teen die wêreld se aanslae? vs 10-11 "Vir die mens wat in gevaar verkeer, is die Here 'n toevlug, 'n skuilplek in tye van nood. Daarom vertrou almal wat U Naam bely, op U, want U, Here, laat dié wat vra na U wil, nie in die steek nie". Dink daaraan hoe God die seisoene laat kom en gaan. Luister na die voëls, kyk op na die son, maan en sterre! Agter al hierdie dinge sal jy die Majesteit van God sien! vs 12 "Sing tot eer van die Here, vertel die volke van Sy dade!" Ons lewens bly nie wintertyd nie, begin Hom dank vir jou lewe!🎶Majesty, Majesty
Your grace, Your grace has found me just as I am. Empty handed but alive in Your hands. Majesty, Majesty, forever I am changed by Your love, in the presence of Your Majesty. - adKoot